كالولك هبل رغم انته بيك حسين
يعني انته الحسين بهيبته وصبره وماكولن هبل وخارطته كلهه ضلوع
سميتك ضلع ولشالـــــــــتك زهره
يلهورك فرات وانته جــــــف عباس
شتنطر من فراتك تــــغرف الجره
مثل عزم البلم اتشكه صدر الماي
بس يابس كلب ماتـشرب الكطره
بتنانيرك غلط لايتعب الحــــطاب
وهن من المواكـــــد جدن الجمره
وياشمس التجي وبوجهه ليل تصير
ومتحجب ضواهه ويكطع الشجره
وياغيمه ال(تمر) توعدنا تمطر خير
وعشنا عللوعود وماشـفت كطره
ومالوم بذنب كل خدي صار عيون
وعرف جف التنشفه وجف التصطره
طشيت العمر دم علكبر الكاع
تبخر بلعجل والخـــــارطه تمطره
بنواعير النجف فريته دم الموت
وبمايه المكابر خضـــــرت حمره
وماعرف الحزن وشكيته زيج الثوب
والطم بالثنيه ومــــــاعرف كبره
عندي اشكد دمع بيه واصبر العين
علصوت الصرخته وضلت الحسره
ولاتطرب بعد بوتارك الخرسان
موال لتكوله ومحــــــــــد يفسره
بسك ياوطن حاتم تعزب الضيف
وبفرسك تصب لو عازت السفره
امس ضيفك لبد والشده نار البيك
حافي عللجمر يفزعلك تـــــنطره
اصبر ياوطن بس شبخه توصل ليه
كصر درب الحزن من تصبر تعبره
هويتك ياوطن وشكبره عشكك صار
بكبر دمع اليتامى وعـازت الفقره
وذمه من الحسين موقعه العباس
العراق بذمتك ياصاحب الحضره
