قصيدة البارحه للشاعر عباس جيجان

قصيدة للشاعر العراقي عباس جيجان .....

البارحة شفت الوطن بالطيف اجاني البارحه ..
قتله هلا ومية هلا يابو الخيول الجامحه ..
مديت اديه تسالمه شفت القلب قبل الجفوف يصافحه ....
شلونك قلت ياموطني وظنوني ظلت سارحه ..
وانقطع وسطي من الخجل من الخجل وعيوني ظلت شابحه ..
قال اطمأن ياولدي كفتنا هي الراجحه ..
قتله الْيِرد ياموطني لحضنك الدافي تسامحه !! ..
قال اْليِرد وإلْما يِردْ وحتى الْيِفكر بالوطن ذنوبه كلهن طايحه ..
بس الْيِخون اُمّيِتهْ ما يستحق نقرا على روحه الفاتحه ..
قتله يبه ياموطني عندي حجي بغزر الدموع المالحه ..
قال احجي قول شما قلت طبع الوطن مثل الابو واجب عليك تصارحه ..
قتله يبه ياموطني ليش انت من دول الدول صاحت عليك الصايحه ؟؟
وليش انت من دون الدول اطفالك الحلوين بالدم سابحه ؟؟
وليش انت من دون الدول بكل بيت عندك نايحه ؟؟
وليش انت من دون الدول ناسك إتْصبّح نازحه ؟؟
وليش انت من دون الدول جيرانه كلها تواقحه ؟؟
وليش انت من دون الدول يا ثور بالعالم قوي تركض عليه تناطحه ؟؟
متْقلي منهو الْخبلك يا بو العقول الراجحه !! ..
شفته ضحك .. شفته ابتسم لمن حِجى و جاوب اجابه واضحه ..
يبقى الوطن هو الاصل والناس هي الرايحه ..
كفكف دموعك ياولد ادري بغريب الدار شوقه الجارحه ..
وادري بغريب الدار كل ما يِعتلي وكل ما صعد وشْما كسب خسران كل ما رابحه ..حتى الطيور إلها وطن تهاجر لجل لمن يهزها الشوق ترجع طافحه ..
وحتى النخيل إلها وطن ما تنشتل إلا بأرضنا المالحه ..
بس إحنا نبقى لِشْ وقت يا موطني نحلم وطنا نصافحه ؟؟ ..
وخلاف الوطن تبقى البشر مثل البهايم دايحه ..
والبارحه شفت الوطن بالطيف أجاني البارحه

مع تحيات اسد بابل الجريح

وااااااااااااااااااااااااااااااو
مشكور حبيبي على الشعر الروعة
نزلت دمعتي

مشكور اسد على هذه القصيدة الجميلة

تحياتي

الرحال

مشكور اسد بابل الجريح على هذه القصيده الرائعه

مشكور

چنه بوكه هذا الشعر

هههههههههههههه
اشمدريج
اي هايه بوكه بس بوكه مال حلال مو مال حرام
كولي ليش
لان هي هم جانت بوكه
ف بوكه في بوكه يساوي حلال
مع تحياتي

» يا عراق للشاعر رحيم المالكي
» شعر للشاعر العراقي باسم الخاقاني
» ابو ذيات للشاعر الشهيد رحيم المالكي اتمنى من كل من يدخل يقرء صورة الفاته على روحه
» اغرب قصيدة حب لأهل البيت(ع)
» قصيدة عن الوطن الحبيب (العراق